ಬಿಸಿನೀರು (ಬೆಂದ್ರು) ತೀರ್ಥ

ದಕ್ಷಿಣ ಭಾರತದಲ್ಲಿಯೇ ಅದರಲ್ಲೂ ಕರ್ನಾಟಕ ಪ್ರಾಂತ್ಯದಲ್ಲಿರುವ ಬಿಸಿನೀರುತೀರ್ಥವೆಂಬುದೊಂದು ಅಪರೂಪವಾದ ಬಿಸಿನೀರ ಬುಗ್ಗೆಗಳ ತಾಣವಾಗಿದೆ.

ಬಿಸಿನೀರುತೀರ್ಥವು ದಕ್ಷಿಣ ಕನ್ನಡ ಜಿಲ್ಲೆ, ಪುತ್ತೂರು ತಾಲೂಕು, ಇರ್ದೆ ಗ್ರಾಮದ ಗೋಪಾಲಕ್ಷೇತ್ರದಲ್ಲಿ ಸೀರೆ ನದಿ (ವರದಾ ನದಿ)ಯ ದಕ್ಷಿಣದ ದಡದಲ್ಲಿ ಶೋಭಾಯಮಾನವಾಗಿದೆ.

ಪುತ್ತೂರು ಪಾಣಾಜೆ ರಸ್ತೆಯಲ್ಲಿ 13 ಕಿಲೋಮೀಟರು ದೂರದಲ್ಲಿ ಬಲಬದಿಗೆ (ಪಶ್ಚಿಮಕ್ಕೆ) ತಿರುಗುವ ರಸ್ತೆಯಲ್ಲಿ ಒಂದು ಕಿಲೋಮೀಟರು ಹೋಗಿ ಪುನಃ ಬಲಕ್ಕೆ (ಉತ್ತರ ದಿಕ್ಕಿಗೆ) ತಿರುಗುವ ಶ್ರೀನಿವಾಸ ರಸ್ತೆಯಲ್ಲಿ ಒಂದು ಕಿಲೋಮೀಟರು ಹೋದಾಗ ಬಿಸಿನೀರು (ಬೆಂದ್ರು) ತೀರ್ಥ ಸಿಗುತ್ತದೆ.

ತೀರ್ಥ ಅಮಾವಾಸ್ಯೆಯ ದಿನ (ಸಿಂಹಮಾಸದ ಸೋಣೆ ತಿಂಗಳ ಅಮಾವಾಸ್ಯೆ, ಸಾಮಾನ್ಯವಾಗಿ ಇಂಗ್ಲೀಷು ತಿಂಗಳ ಸೆಪ್ಟಂಬರಿನ ಮೊದಲ ಭಾಗದಲ್ಲಿ ಬರುವುದು) ಇಲ್ಲಿ ಸ್ನಾನ ಮಾಡುವುದಕ್ಕೆ ಬಹಳ ಮಹತ್ತ್ವವಿದೆ.

ಊರ ಹಿರಿಯರಿಂದ ಸಂಗ್ರಹವಾದ ವಿಷಯಗಳ ಆಧಾರ ಪ್ರಕಾರ ತೀರ್ಥ ಅಮಾವಾಸ್ಯೆಯ ಹಿಂದಿನ ದಿನವಾದ ಚತುರ್ದಶಿಯಂದು, ಜಗದ್ರಕ್ಷಕನಾದ ಶ್ರೀಮನ್ನಾರಾಯಣನು ಲಕ್ಷ್ಮೀದೇವೀಸಮೇತನಾಗಿ ಗರುಡಾರೂಢನಾಗಿ ಬಂದು ಇಲ್ಲಿ ಸ್ನಾನ ಮಾಡುವನೆಂದೂ, ಅವನು ಸ್ನಾನ ಮಾಡಿದ ನೀರಿನಲ್ಲಿ ತೀರ್ಥಸ್ನಾನ ಮಾಡುವುದು ಮುಕ್ತಿಪ್ರದವೆಂದೂ ನಂಬಲಾಗಿದೆ.

ಲಕ್ಷ್ಮೀನಾರಾಯಣಸ್ವರೂಪಿಗಳಾದ ನವ ವಧೂವರರು ಇಲ್ಲಿ ತೀರ್ಥಸ್ನಾನ ಮಾಡುವುದು ಇದಕ್ಕೆ ಸಾಕ್ಷಿಯಾಗಿದೆ. ಗರುಡಪಕ್ಷಿಗಳೆರಡು ಪ್ರತಿವರ್ಷವೂ ಬಂದು ಸ್ವಲ್ಪ ಕಾಲ ನೆಲಸಿ, ನಾಲ್ಕಾರಾಗಿ ಹೋಗುವುದನ್ನು ಇಂದಿಗೂ ಕಾಣಬಹುದು.

ನದಿಯಲ್ಲಿ ಸ್ನಾನಮಾಡಿ ತೀರ್ಥಕ್ಕೆ ಪ್ರದಕ್ಷಿಣೆ ಬಂದು ಗಂಗಾಪೂಜೆ ಮಾಡಿ ಸ್ನಾನದ ಸಂಕಲ್ಪ ಮಾಡಿ ತೀರ್ಥದಲ್ಲಿ ಒಂದು ಪೂರ್ಣ ಮುಳುಗು ಹಾಕುತ್ತ ಐದು ಎಲೆ, ಒಂದು ಅಡಿಕೆ ಮತ್ತು ಒಂದು ನಾಣ್ಯವನ್ನು ಬಿಡುವುದು ಪದ್ಧತಿ. ಪುನಃ ತೀರ್ಥಕ್ಕೆ ಸುತ್ತು ಬಂದು ಇನ್ನೊಂದು ಮುಳುಗು. ಇದೇ ರೀತಿ ಮೂರನೇ ಮುಳುಗು ಹಾಕಿದ ಮೇಲೆ ಪಂಚಮುಖೀ ತೀರ್ಥ ಸ್ನಾನ ಮಾಡಿ ಬಟ್ಟೆಯನ್ನು ಹಿಂಡಿ ಪ್ರಾರ್ಥನೆ ಮಾಡುತ್ತ ಅಶ್ವತ್ಥ ಮರಕ್ಕೆ ಪ್ರದಕ್ಷಿಣೆ ಬಂದು ಹಣ್ಣು-ಕಾಯಿ, ಕಾಣಿಕೆ ಮೊದಲಾದವುಗಳನ್ನು ಅರ್ಪಿಸಿ ತೀರ್ಥ ಪ್ರಸಾದ ತೆಗೆದುಕೊಳ್ಳುವುದು ನಿಯಮವಾಗಿದೆ.

ಅಂಟುಜಾಡ್ಯವಿರುವವರಿಗೆ, ಆಶೌಚದವರಿಗೆ ಕೊಡದಲ್ಲಿ ನೀರನ್ನು ಮೇಲೆ ತಂದು ಕಲಶಸ್ನಾನ ಮಾಡಿಸುವುದರಿಂದ ತೀರ್ಥದ ಪಾವಿತ್ರ್ಯವನ್ನು ಕಾಪಾಡಲಾಗುತ್ತದೆ.

ಸದಾಕಾಲವೂ ಕೊಳದ ಮಧ್ಯದಲ್ಲಿ ಕಲ್ಲುಗಳೆಡೆಯಿಂದ ಚಿಮ್ಮುವ ಬಿಸಿನೀರ ಬುಗ್ಗೆಗಳು ಇಲ್ಲಿಯ ವಿಶೇಷವಾಗಿದೆ. ಗಂಟೆಗೆ 1350 ರಿಂದ 4600 ಲೀಟರುಗಳಷ್ಟು ಚಿಮ್ಮುವ ನೀರು 108° ಫೇರನ್ಹೀಟ್ (39° ಸೆಂಟಿಗ್ರೇಡ್) ಉಷ್ಣತೆಯನ್ನು ಹೊಂದಿದೆ. ಈ ನೀರನ್ನು ಕುಡಿಯಲು ಉಪಯೋಗಿಸಬಹುದೆಂದು ಸಂಶೋಧನೆಯಿಂದ ತಿಳಿದು ಬಂದಿದೆ.

ಸುಮಾರು ಅರುವತ್ತು ವರ್ಷಗಳ ಹಿಂದೆ ಸಹೃದಯಿ ದಿ। ಡಾ! ಶೀನಪ್ಪ ಭಂಡಾರಿಯವರು ಬಿಸಿನೀರು ಕೊಳದ ಸುತ್ತಲೂ ಕೆಂಪು ಕಲ್ಲಿನಿಂದ ಕಟ್ಟೆ, ಮೆಟ್ಟಲುಗಳನ್ನು ಕಟ್ಟಿಸಿದರು.

1986 ರಲ್ಲಿ ಊರ ಪರವೂರ ಮಹನೀಯರೆಲ್ಲರೂ ಸೇರಿ 'ಬೆಂದ್ರು ತೀರ್ಥ ಅಭಿವೃದ್ಧಿ ಕ್ರಿಯಾಸಮಿತಿ'ಯನ್ನು ರಚಿಸಿಕೊಂಡು ಮಾಡಿದ ಪ್ರಯತ್ನಗಳಿಂದಾಗಿ ಮತ್ತು ಅಗತ್ಯವಿದ್ದ ರಸ್ತೆಗಾಗಿ ದಿ। ಯನ್. ಶ್ರೀನಿವಾಸ ರೈಗಳ ಮತ್ತು ಕೊಳದ ಸುತ್ತಲೂ ದಿ। ಸರಸ್ವತಿ ಭಂಡಾರಿಯವರ ಸ್ಥಳದಾನದಿಂದಾಗಿ ಈ ಬಿಸಿನೀರು ತೀರ್ಥದ ತಾಣವು ಕರ್ನಾಟಕ ಸರಕಾರದ ವತಿಯಿಂದ ರಸ್ತೆ ಮತ್ತು ಕಟ್ಟಡಗಳ ನಿರ್ಮಾಣವಾಗಿ ಸುತ್ತಲೂ ಕಲ್ಲು ಹಾಸಿ, ಪ್ರವಾಸೀ ಕೇಂದ್ರವೆನಿಸಿತು. ಪ್ರವಾಸಿಗಳು ಅಲ್ಲಿ ತಮ್ಮ ಉಪಾಹಾರಕ್ಕೆ ಬೇಕಾದುದನ್ನು ತಾವೇ ತೆಗೆದುಕೊಂಡು ಹೋಗಬೇಕಾಗಿದೆ.